白癜风药物 http://m.39.net/pf/a_7509460.html作者：吴翼民
诵读：牛美华
审阅及推荐：丁迪蒙
编辑：王乙其
我屋里附近有一个邪气大个农贸市场，搿是我几乎每日天侪要去光顾个地方。
勒我屋里家务个劳动分工当中，买菜生活总归是我个，爱人呢，则是拾遗补阙。搿能，我搭爱人对附近个农贸市场就有了各自个体验。搿体验有同也有异，同者，大家侪奉行“相面买菜”个法则；勿同者，勒“相面”个对象浪大异其趣。
我个“相面买菜”，是看卖菜个对象面目善与勿善，再讲得明白眼，就是看卖菜个人相貌长得是否周正。一般来讲，相貌周正个人，心地也相对周正，勿大会坑人，包括短斤缺两、移花接木、以次充好……相反搿就老难讲了。我是有过经验教训个，有趟买虾，是个长得尖嘴猴腮个虾贩，居然勒虾里向掺了一只拳头恁大个冰块，跑去倒扳账，虾贩原来是“游击队”，老早就连得影子也没了；还有趟买带鱼，是个面孔浪向长横肉个女人，信誓旦旦个讲，伊卖个是本地带鱼，我买到屋里想烧好仔一吃，吃上去味道竟然是像咬蜡一样个洋带鱼，还有呈珠状个脊椎骨为凭，去倒扳账，搿个女人就是勿认账，还讲我勒诈伊。有了迭些教训，我勒买菜辰光就尽量选长得面目端庄、清秀眼个户头，自认为眉清目秀个人勿可能奸滑到啥地方去，尤其是看伊拉两只眼睛，通常侪是纯真个，反映出伊心地个善良。现在，附近搿家农贸市场个肉墩头、鱼虾摊、蔬菜点……我侪有固定个摊主个。
爱人个“相面买菜”呢，勿在于摊主面孔长得是否周正，而是可怜勿可怜，再讲得确切眼，就是摊主是勿是懒人，凡是有眼年纪个摊主就成为了伊首选个对象。理由是，人家介大岁数了，还出来做生意，同样卖菜，让伊拉早眼卖脱好早眼转去，免得耗勒搿搭受罪。女人大概侪富有同情心伐，尤其是同情老弱病残，搿也没啥责怪个，所以凡是我搭爱人一道到菜场去，就依牢伊个选择买菜，专门寻年纪大、还形貌枯槁个摊主，做成生意，也勿忍心讨价还价。
但是，我伲个“相面买菜”经验侪先后失灵了。
伊个一日，有人客来访，我去农贸市场备一桌便宴个菜料，主菜是拿手个母鸡汤。卖鸡个摊主是个长得蛮清秀个大嫂，平常我也去买伊个鸡，搿趟，伊帮我挑了只“放养”个草鸡。伊货真，我价实，伊看到鸡嗉囊有食物，还返还了我两元洋钿。但是，回来烧鸡汤，一炖就酥脱了，鸡汤寡淡一眼也勿香，啥地方是啥个“放养”个草鸡啦？爱人让我去倒扳账，我讲侪是熟人，蛮难为情个。可能伊就是利用了“熟人”个面子，拨我下套子了，来了个“杀熟”。乃末爱人就笑话我“相面买菜”失灵了。
其实，家主婆个经验也未必灵到啥地方，譬如伊有个固定买蔬菜个摊点，摊主是个邪气干瘪个老头子，家主婆曾经问过伊年龄，回答刚过脱六十，竟然是比伊还年轻。一眼看上去，老头子个形貌做爷也勿为过，就凭搿一点，家主婆就大为同情，每趟去买菜总归去做成伊个生意。有一趟，家主婆从伊搿搭买了两斤竹笋，回转来之后，我总归觉着分量勿足，去寻杆秤一称，足足缺了半斤噢，天啊！
看来，“相面买菜”未必是可靠个，我搭家主婆侪需要重新调整买菜个经验了。
————————————————————————————————————————————
作者：吴翼民
诵读者：牛美华
—————————————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
————————————————————————————
欢迎大家
